ما إيدوم غير الخير دير أحسابك

ما إيدوم غير الخير دير أحسابك
فالدنيا اللي ميمولها الفنا
وزيّن أخلاقك كيف زين وجابك
وأبعد عليه الحقد والبغضا
وأبعد علي لنذال سكّر بابك
ورافق أجواد وجود بيه عطا
وراعي اشعور الناس كيف أقرابك
وبالصبر أتحلى أجر فيه عزا
ووفي أمعاهم ما تهون أصحابك
والجيره أحفظها عد ما تخطا
وخلك منلي ما نهار شقابك
بلا كره عنه خير زيد جفا
وفكرك ان تاه أتياه ضل مشابك
شور المهالك راك ضعت هبا
وكانك أزعلت أمسك أرسان أعصابك
ما جاب الغضب من قبل غير أدعا
ولا نشيل ملي قال قول أغتابك
إيشيل من أذنوبك له أردود أكفا
وسامح اللي مخطي خطا بجنابك
عزيز نفس من يقدر ضعيف عفا
والحق ديمه حق هو مشرابك
ديره ولا ترضى عليه غنا
وداب المروه دير ديمه دابك
وراك أتخلى عن عويز أن جا
ولا أتدير شي إن كان فعله رابك
قلبك دليلك لو أتبعت أهدا
وتمسك بدينك ما يضيع ثوابك
وسنة نبيك لك طريق نجا
ويارب يا باري نهار عذابك
أحفظ عضانا من سعير صنا
وصلاع النبي رحمه نزل بكتابك
اختام لكلامي م الصميم نقا.