اضايقت من ضيم الحياة وهلها

اضايقت من ضيم الحياة وهلها
لها شروط مابا خاطري يقبلها
حياة يا مرداها ....
كثير خيرها لكن قليل هناها
وناس واجدة لطت علي مبداها
ورا المادة ضاعت وضاع عملها
العيب يوجعك م اللي شهير نباها
موش من الذيول اللي ردي منسلها
مغير الخلايق ضالات ارياها
اليوم عندها الكحيل كيف بغلها
حياة كدية ......
حياة خيرها واجد وموش هنية
أوقات تنبسط يبقى عشاك قلية
خير من اموال امكدسة تجملها
ويبقى أساسها مسروق موش نقية
لعويلتك تجيب حرام و توكلها
حتى لو اتعيش اسنين فوق المية
اتجي ساعتك والله ما ينشلها